Tekniko samarra iruditu arren, ziur jada erabili duzula, konturatu gabe izan bada ere. NFC teknologia zer den eta nola erraztu dezakeen zure bizitza ulertu nahi baduzu, modu erraz batean azalduko dizugu.

Zer da NFC teknologia?

NFC Near Field Communication esan nahi du (eremu hurbileko komunikazioa, euskaraz). Elkarrengandik oso hurbil dauden gailuen artean datuak igortzea ahalbidetzen duen hari gabeko teknologia da. Normalean, gailuen arteko tartea zentimetro gutxi batzuetakoa izango da. 

Bluetooth-aren moduko hari gabeko beste sistema batzuek ez bezala, NFC teknologiak ez du aldez aurretiko konexiorik behar. Bi gailuak hurbildu besterik ez duzu haiek komunikatzen hasteko. Metodo sinple eta segurua denez, eremu askotan erabiltzen da orain.

NFC teknologiaren jatorria, laburturik

NFC teknologia RFID (Radio Frequency Identification) teknologiatik dator. Azken hori orain duela hainbat hamarkada erabiltzen da, objektuak irrati-uhinen bidez identifikatu eta arakatzeko. Teknologia hau oinarri horretan oinarrituz garatu zen, elkarrekintza areagotuz eta bere ezaugarriak hobetuz, gailu mugikor, txartel eta abarretan erabiltzeko xedearekin.

2000. urteko hamarkadan garatu zenetik, NFC teknologia estandar global bihurtu da, eta sektore askotan erabiltzen da eskaintzen dituen moldakortasunari eta segurtasunari esker.

NFC teknologiaren erabilera ohikoenak

Kontakturik gabeko ordainketak

Teknologia honen erabilerarik ospetsuenetako bat contactless ordainketa da. Zure gailu elektronikoa (mugikorra edo smartwatch-a, adibidez) edo txartela saltokiko terminalera (ST) hurbiltzen baduzu, eskudirua izan gabe edo txartel fisikoa sartu gabe eros dezakezu.

Garraio publikoko txartelak

Hiri askok erabiltzen dute NFC teknologia beren garraio-sistemetan. NFC onartzen duen txartela edo gailua edukiz, autobusetan, metroan edo trenetan sar zaitezke keinu bakarra eginez.

Identifikatzeko eta tokietan sartzeko

NFC teknologia ateak irekitzeko, bulegoetan sartzeko eta ekitaldietarako sarbidea kontrolatzeko ere erabiltzen da giltza digitaletan. Praktikoa da eta giltza fisikoen beharra murrizten du.

Informazio-trukea

Gailu batzuek datuak (hala nola kontaktuak edo argazkiak) NFC bidez partekatzeko aukera ematen dute. Horretarako, gailuak elkarrengandik hurbil kokatu behar dira. Ezaugarri horrek beste aukera batzuekin alderatuta ospea galdu badu ere, oraindik ere erabilgarria da kasu jakin batzuetan.

Erabilera gailu adimendunetan

Contactless teknologia duten erloju eta eskumuturreko adimendunak bikainak dira berehalako ordainketak egiteko edo zure ariketa fisikoari buruzko datuak berehala erregistratzeko.

Ba al daude NFC mota desberdinak?

NFC teknologiak ez ditu “mota” desberdinak berez, baina bere erabilera ezberdinak helburuaren arabera sailka daitezke: 

• Irakurgailu modua: NFC gailu batek etiketa edo txartel bateko datuak irakurtzen dituenean (hala nola garraio-txartel batekoak).
• Igorle modua: Gailuak txartel edo giltza digital gisa funtzionatzen duenean (adibidez, telefono mugikorrarekin ordaintzean).
• Peer-to-peer modua: Bi gailuren arteko noranzko biko komunikazioa ahalbidetzen du informazioa partekatzeko.

NFC teknologia segurtasunez erabiltzeko gomendioak

Diseinuz nahiko teknologia segurua den arren, garrantzitsua da neurri batzuk kontuan hartzea: 

• Aktibatu NFC teknologia behar duzunean bakarrik: Horrek baimenik gabeko sarbideen arriskua murriztuko du.
• Konfiguratu segurtasun-neurriak zure gailuan: Erabili pasahitzak, PIN kodeak edo ezagutza biometrikoa.
• Egiaztatu ordainketa-terminalak: Ziurtatu fidagarriak direla zure gailua erabili aurretik.

Zergatik da garrantzitsua NFC teknologia?

Orain NFC teknologia zer den badakizula, errazago ulertuko duzu zergatik dagoen teknologia hau hain hedatuta. Sinplea, azkarra eta segurua denez, ezin hobea da gure eguneroko bizitzako zeregin askotarako. 

Denda batean ordaintzetik bulegoan sartzera edo autobusera igotzera, eremu hurbileko komunikazio-teknologia gero eta garrantzitsuagoa da gure eguneroko bizitza errazteko funtsezko tresna gisa.