Aínda que poida parecer algo técnico, seguro que xa a usaches, mesmo sen darte conta. Se che interesa entender que é a NFC e como pode facilitarche a vida, explicámoscho dun xeito sinxelo.
NFC son as siglas de Near Field Communication ou comunicación de campo próximo, en galego. É unha tecnoloxía sen fíos que permite a transmisión de datos entre dispositivos que están moi próximos, normalmente a uns poucos centímetros de distancia.
A diferenza doutros sistemas sen fíos, como o Bluetooth, a NFC non require unha conexión previa. Só tes que achegar os dous dispositivos para que se comuniquen. Este enfoque sinxelo e seguro permitiu que se adoptase en moitos ámbitos.
A NFC deriva da tecnoloxía RFID (Radio Frequency Identification), que se usa desde hai décadas para identificar e rastrexar obxectos mediante ondas de radio. Esta tecnoloxía evolucionou a partir desa base e engadiu unha maior interacción e capacidades para o seu uso en dispositivos móbiles, tarxetas e moito máis.
Desde o seu desenvolvemento na década de 2000, a NFC converteuse nun estándar global, que se emprega en múltiples sectores grazas á súa versatilidade e seguridade.
Pagamentos sen contacto
Unha de las aplicacións máis populares desta tecnoloxía é o pagamento contactless. Ao achegar o teu dispositivo electrónico (móbil ou reloxo intelixente, por exemplo) ou unha tarxeta ao terminal de punto de venda (TPV), podes realizar unha compra sen necesidade de diñeiro en efectivo ou de introducir a túa tarxeta física.
Tarxetas de transporte público
Moitas cidades empregan a tecnoloxía NFC para os seus sistemas de transporte. Cunha tarxeta ou un dispositivo habilitado, podes acceder ao transporte en autobús, metro ou tren cun simple xesto.
Identificación e acceso
A NFC tamén se usa en chaves dixitais para abrir portas, acceder a oficinas ou controlar o acceso en eventos. É práctica e reduce a necesidade de chaves físicas.
Intercambio de información
Algúns dispositivos permiten compartir datos, como contactos ou fotos, cando se achegan. Aínda que esta funcionalidade perdeu popularidade en comparación con outras opcións, segue sendo útil nalgúns casos.
Uso en dispositivos intelixentes
Os reloxos e as pulseiras intelixentes con tecnoloxía contactless son perfectos para realizar pagamentos ou para rexistrar datos de actividade física de forma inmediata.
A tecnoloxía NFC non ten “tipos” como tal, pero as súas aplicacións pódense clasificar segundo o seu propósito:
- Modo lector: cando un dispositivo NFC lee datos dunha etiqueta ou tarxeta (como nun billete de transporte).
- Modo emisor: cando o dispositivo actúa como unha tarxeta ou chave dixital (por exemplo, ao pagar cun móbil).
- Modo peer-to-peer: permite a comunicación bidireccional entre dous dispositivos para compartir información.
Aínda que é unha tecnoloxía bastante segura por deseño, é importante ter en conta algunhas precaucións:
- Activa a NFC só cando sexa necesario: isto reduce o risco de acceso non autorizado.
- Configura medidas de seguridade no teu dispositivo: usa contrasinais, PIN ou recoñecemento biométrico.
- Consulta os terminais de pagamento: asegúrate de que sexan de confianza antes de usar o teu dispositivo.
Agora que xa sabes o que é a NFC, é máis doado ver por que esta tecnoloxía está tan estendida. A súa combinación de sinxeleza, velocidade e seguridade fai que sexa ideal para moitas aplicacións que usamos no día a día.
Desde pagar nunha tenda ata acceder á túa oficina ou subir a un autobús, a tecnoloxía de comunicación de campo próximo continúa a gañar terreo como ferramenta clave para simplificar a nosa vida diaria.
