Non precisas levar a tarxeta física para facer pagamentos. Se te estás a preguntar como podes pagar coa tarxeta desde o móbil, aquí che explicamos todo o que precisas saber. 

Que é unha wallet e como funciona?

O pagamento co móbil é posible grazas ás wallets dixitais. Unha wallet é unha aplicación que garda de xeito seguro os datos da túa tarxeta de crédito ou débito. Funciona como unha carteira virtual e utiliza tecnoloxías como NFC (Near Field Communication) para facer transaccións sen contacto. 

Algunhas das wallets máis coñecidas son as que veñen integradas nos sistemas operativos dos teléfonos, pero tamén hai aplicacións específicas de entidades bancarias ou provedores de servizos. 

Como configurar a túa tarxeta no teléfono móbil?

O proceso é realmente sinxelo: 

1. Descarga unha wallet: Se o teu móbil non trae unha de fábrica, podes descargala desde a tenda de aplicacións. Evita expoñéreste a calquera posible fraude e descarga só aquelas que sexan de confianza. 
2. Engade a túa tarxeta: Insire os datos da túa tarxeta manualmente ou escanéaa coa cámara do móbil. 
3. Verifica a túa identidade: En moitos casos, terás que confirmar que es o titular mediante unha mensaxe de texto ou un código enviado pola túa entidade. 
4. Listo para usar a tarxeta! 

En canto remates a configuración, poderás empregar o móbil para mercar en calquera comercio que teña un terminal de pagamento compatible coa tecnoloxía contactless. 

Casos de uso: máis aló do móbil

A tecnoloxía non só está nos smartphones. Tamén podes pagar con reloxos intelixentes ou pulseiras que teñan tecnoloxía NFC. Estes dispositivos funcionan de xeito similar ás wallets móbiles: vencellas a túa tarxeta e simplemente achegas o dispositivo ao terminal de pagamento. 

Por exemplo, se es unha persoa á que lle gusta correr ou facer actividades ao aire libre, cun smartwatch podes parar a mercar auga ou aproveitar para facer as túas compras sen a molestia de ter que levar a carteira. 

Vantaxes de pagar con tarxeta desde o teléfono móbil

• Rapidez: Só tes que achegar o teu teléfono móbil ao lector e, en cuestión de segundos, a transacción estará completada. 
• Comodidade: Non tes que preocuparte de levar a túa tarxeta física nin de buscala na carteira. 
• Seguridade: As wallets usan tecnoloxías avanzadas como a tokenización, que encripta os teus datos e protéxeos en cada pagamento. Ademais, os dispositivos requiren autenticación para completar a transacción (normalmente mediante pegada dixital, PIN ou recoñecemento facial). 
• Versatilidade: Pódese usar nunha gran cantidade de comercios e servizos, como supermercados, bares, tendas ou transporte público. 

Consellos para un uso seguro

• Protexe o teu dispositivo: Activa contrasinais, pegadas dixitais ou recoñecemento facial para evitar que alguén máis poida acceder á túa wallet. 
• Mantén a aplicación actualizada: Isto garante que teñas as medidas de seguridade máis recentes. 
• Verifica o terminal de pagamento: comproba que o comercio sexa de confianza e que o lector do dispositivo estea habilitado para pagos contactless. 

Aprender a pagar con tarxeta desde o móbil mellora a túa experiencia de compra. Tanto pola súa comodidade como pola súa facilidade de uso, este método é unha boa alternativa para os pagamentos tradicionais. Ten sempre presentes os nosos consellos para usalo con seguridade.