Se estás a comezar no mundo das vendas en liña, probablemente te esteas a preguntar como crear un catálogo de vendas que sexa visual, doado de navegar e que conecte cos teus futuros clientes. Só precisas ter en conta algúns aspectos clave que che axudarán a crear unha experiencia atractiva, profesional e eficaz.
Antes de poñerte a subir fotos e prezos, o mellor é definir a estrutura do catálogo. Como se van organizar os produtos? Por categoría, por tipo de uso, por cores…?
Agrúpaos de xeito lóxico para que o visitante non se perda. Se tes una tenda de roupa, por exemplo, podes dividir en camisetas, pantalóns, accesorios, etc. Pensa en como procura o teu cliente e faino sinxelo.
Non hai necesidade de encher a páxina con elementos que distraian. Un deseño limpo, cunha boa xerarquía visual é máis eficaz que unha recargada. Usa espazos en branco para que cada produto poida respirar.
As fontes tamén xogan un papel importante. Usa fontes claras e lexibles. Podes combinar unha fonte máis rechamante para os títulos con outra máis neutra para os textos descritivos. O importante é que non cansen a vista e que funcionen ben en dispositivos móbiles.
As fotos son o corazón do teu catálogo en liña. Asegúrate de que cada imaxe teña boa resolución, iluminación natural e fondo neutro. É importante que coides os detalles.
Amosa varias vistas do produto: frontal, lateral e en uso (se é posible). Lembra tamén que cada imaxe debe ter texto alternativo (alt text) que describa o que se ve, tanto por accesibilidade como para o posicionamento nos buscadores.
Un dos erros máis comúns é agochar os prezos ou poñelos en letra pequena. Isto crea desconfianza e pode facer que o usuario abandone a páxina.
Amosa o prezo xunto ao produto, cun deseño que o faga destacar. Se hai descontos, indícaos claramente (por exemplo: “Antes 40 €, agora 32 €”). Non uses fórmulas confusas.
Non empregues só descricións sinxelas como “camiseta branca de algodón”. Explica brevemente o valor que achega ese produto. É ecolóxico? Ten algún corte especial? Como se sente ao tacto?
Pensa en como lle describirías o teu produto ou servizo a alguén que non o poida ver nin tocar. Sé breve, pero informativo. Usa unha linguaxe familiar, evita a xerga técnica innecesaria e destaca o que fai que o teu produto sexa especial.
O teu catálogo fala por ti. Usa unha linguaxe clara, directa e que conecte co teu público. Comunícate coma se estiveses a falar con alguén que acaba de entrar na túa tenda física.
Se vendes algo máis emocional (como arte, moda ou experiencias), podes ser un pouco máis creativo. Se o teu é máis funcional (como ferramentas ou tecnoloxía), sé máis técnico, pero sen perder a proximidade. É aconsellable adaptarse á xerga do teu sector sen afastar novos clientes potenciais.
Non todo o mundo navega por internet do mesmo xeito, e o teu sitio web debe adaptarse a iso. Aquí tes algúns puntos clave:
- Usa cores con bo contraste para garantir que os textos sexan lexibles.
- Asegúrate de que o tipo de letra estándar teña un tamaño mínimo de 16 px e de que ningún outro texto estea por debaixo dos 12 px.
- Inclúe textos alternativos nas imaxes para que os lectores de pantalla poidan interpretalas.
- Evita depender só da cor para transmitir información (por exemplo, non poñas os produtos con desconto en vermello sen engadir outro elemento visual).
- Comproba que se pode navegar usando só o teclado.
Un catálogo bonito non é moi útil se non é funcional. Engade botóns visibles de “Engadir á cesta” ou “Mercar”. Se vendes a través de WhatsApp ou das redes sociais, inclúe botóns de contacto ou chamadas á acción claras. Ter unha opción de procura de palabras clave tamén facilitará que os teus clientes atopen o que buscan.
Se ofreces produtos ou plans semellantes entre eles, sempre é interesante ter unha opción para comparalos. Canto máis sinxelo sexa o proceso, mellor será a experiencia do usuario.
A maioría das visitas a tendas en liña fanse desde teléfonos móbiles. Polo tanto, asegúrate de que o teu catálogo se vexa ben en pantallas pequenas: imaxes que se axusten, textos que non estean cortados e botóns que se poidan tocar facilmente co dedo.
Proba o teu sitio web en diferentes dispositivos antes de publicalo.
Non hai nada peor que atopar un produto que xa non está dispoñible. Consulta o teu catálogo con regularidade, elimina os artigos que xa non tes á venda, axusta os prezos se é necesario e engade artigos novos.
É importante que sinales claramente se os teus produtos dispoñen de stock, se están esgotados ou se simplemente xa non están dispoñibles. Un sitio web actualizado xera confianza e demostra que estás activo e atento ao teu negocio.
Saber como crear un catálogo de vendas atractivo é unha mestura de deseño, contido e experiencia de usuario. Non é esencial que empregues ferramentas complexas nin fagas grandes investimentos para conseguilo. Cunha boa planificación, atención aos detalles e estes consellos, podes crear un catálogo que reflicta o mellor do teu negocio e converta as visitas en vendas.
Comeza polo esencial, mellora pouco a pouco e escoita os teus clientes. Un catálogo ben deseñado marca a diferenza.
